MEMORI SURINDAN KOPI

By. Bang Tigan.
Maaf edisi Bahasa Batak Karo

*Tambur dekdek … Tambur dekdek
Bulung surindan
Mari kuecek … mari kuecek
si nande tigan.
Rembus angin … Rembus angin
Arah kenjulu
Nandé Nangin … Nandé Nangin
Kalak pencemburu …
Taka ranting … taka ranting tama ku para
Nande Ginting … Nandé Ginting pet kel ngerana. dst*

Pernah begi kam lagu enda? 😀
Bagi danak-danak era tahun 70 ku 80, lagu enda cukup populer iendeken kalak i tengah kesain.
Sada lagu situjuken kempak beru si lima.

Ah. Tapi kita lupaken lebe Beru Si Lima. Kita lupaken ngecek-ngecek si Nande Tigan.
Gundari kita fokus lebe ku Nandé Nangin eh … Bulung Surindan! 😀
Tandai kam kin bulung SURINDAN?
” Benalu” nina kin bahasa Melayu-na. Tanaman parasit si numpang nggeluh ibas batang kayu. Encedai pertumbuhan pokok inang ngenca pengkebetna. Anceng nina kin Bengkila.

Eit, tapi timai lebe!
Amin encedai induk semang, ula kam mapas, sebab enterem kel kalak si ndarami bulung-bulung ajaib enda. Terlebih surindan si nggeluh ibas batang kopi. Ya, surindan kopi, ninta gelarna.

Enggo terberita ibas dunia pengobatan herbal maka surindan kopi jadi sada pulungen tawar si erguna nambari kanker, membunuh sel tumor, tambar kalak tabun, penusur tekanan darah, engkurangi sora mengker, melancarkan peredaren dareh, mengembalikan fungsi hati ras ginjal, bage pe nambari hepatitis. Luar biasa bukan? Kerina tinepa Dibata lit kepe lakonna. Pujin man Dibata ibas ingan simeganjangna. Amin? Yes…

Ceritana, tahun 1995, Bapa tengah jabuku sempat ertambar ku sekalak tabib tradisional i sekitaren Kecamatan Kabanjahe erkiteken penakit si mekelek singgah man bana. Salah sada pulungen tawarna emekap SURINDAN KOPI. Bagé me pemindon sang guru sibaso.

Emaka sempat piga-piga wari aku kuskas ndaramisa. Puji Tuhan, ibas sada reba si terulang i tepi kuta, kudat piga-piga batang kopi si dem surindanna. Meriah ukur tentu saja.
Tapi apalah daya, jelma hanya berusaha, kesah la kita punana. Surindan kopi jadi sada pulungen tawar si terakhir pinakit kula bapa. Sebab kenca sie, mulih me bapa ndahi si nempana. Rest in Palace, Bapak!

Dua bulan kenca sie, reh me telu kalak anak kuta ndauh ndarami surindan kopi ku kuta kami. Kebetulan kami jumpa. Adi kuidah tempasna, pastilah perbapan setengah baya enda kalak mehaga, sebab necis kel peruis bage pe sepatuna. Kerehena pe ermotor pribadi, suzuki Katana warna mbulan, mulus melinang, mbaru tukur.

“Enggo telu wari kami kidaram e, Nak. Emaka bujur kel, enggo dat kami bagenda buena,” nina sekalak perbapan ndai man bangku tupung kubabai rombongen e ku ingan batang kopi si pernah kubuati surindan-na.
Puas kel akapna. Siang ayona. Ermengkah ate kel ia.
Bahan ermengkahna, mulih perani surindan kopi, minter babaina aku singgah man i BPK si lit i tengah kuta. Wari enggo nandangi ciger.
Tapi erkiteken aku bagi siterudu, maka kutolak halus ajakenna.

“Kutadingken ndai kempundu kitik denga rumah sisada, Pa. Emaka sentabi, aku pinter ku rumah,” ningku pamit.

“Adi bage, bungkus saja bandu yah. Rumah kari panndu. Bungkus sada, Pal!” nina perbapan ndai minter kempak perpanggang. Perpanggang pe piah pelebe pesanen man bangku.

“Bujur melala Nak, ya. Enggo mbelin kel penampatndu man kami sekalenda,” belas permotor Katana Mbulan man bangku sope kami sirang. Igelemkenna sebungkus isap gudang garam internasional ras serpi 20 ribu ku tanku.
Sempat kutolak alu basa basi si la lit oratna, tanda aku mehamat, iklas, pura pura la butuh. Lang i je nge situhuna ukurku. 😀
Munafik dikit lah, mekin.

Segedang dalan mulih ku rumah, lo tole meriah ukurku. Kuinget minter Nande Jabu. Sekale, uga pe enggo entabeh kel akapna man, belasku bas pusuh, sebab lit ku kanting sada bungkus panggang man bengkau perpanganen ciger wari.

Jujur, telu wari enda, aku memang la baci ku juma, sebab isuruh Nande Jabu ngiani anak kami sintua, si umurna sekitar 7 bulan denga.
Lit pe nande jabu paksa iyahken tetangga ngemo rani kopi i jumana.
Situhuna, aku nggo menawarkan gegeh si ergancih, tapi la ipeturut si empuna kopi.

“Diberu kami je kerina, Tongat. La kap kami luas adi lit campurna dilaki,” nina Nini si mada kopi ngolangi aku.
Emaka surung me aku jadi si ngian anak i rumah janah Nande Jabu ngemo rani kopi.

Maklum teman, tupung sie, kami termasuk jabu si mbaru, lenga lit gelemen. Jadi kami i ajari keadaan guna mempalar. Ulih ngemo terakap usur jadi penukur setumba beras ras ikan kacepe adum terung ras bulung gadung.
Yah, terung ras bulung gadung!
Nggeluh erpala pala. Anak kitik denga, sinuan-sinuan lenga rani, penjayon enggo keri. Emaka kai pe dadap gelah ula pajek gara api 🔥.
Selama enda, lo tole megati kubaba jaung 🌽 nguda juma nari, gelah baci igoreng jadi perkedel guna bengkau man. Sebab penukur kacepe ras ikan kuli pe megati nge mutus i tengah dalan.
Adi man daging ningkena, timai nge usur erkata gendang i jambur kuta maka nanami.
Prihatin! Prihatin, nina kin presiden njanah pekeskes gendit.

Singkat cerita, seh rumah, enggo kudapeti nande jabu paksa kepe mere minem anak sintua i babo ampunna.
Memang ingan ngemo rani kopi labo ndauh, maka isempatkan nande jabu me usur mulih ku rumah guna man ciger, sekalian neteki anak si lenga mulang.

“Eh, ndubem kam seh e?” ningku man nande jabu, bagi tempa tersengget.

“Edengang. Kam ja nari kin ndai e?” jababna rikut nungkun kemamangen. Kuidah ayona megara. Mungkin nembeh atena ban la dapetina aku i rumah. Entah perbahan latih akapna dampar las ciger wari si la teralang? Entahlah…

“Lit ka ndai dahinku entisik. Enggo kam man?” ningku ngalihken cakap.

“Lenga. Radu seh nge kita e.”

“Adi bage, man kam yah. Lit ndai kubaba panggang, bere kalak,” ningku janah mis ku angkati panci nakan ras piring ku tengah jabu. Kuturiken sitik pengalaman ciger wariku man bana, segelah tangkas janah ula gara ukurna. Maklum, beru Sembiring, la kenca tepat alasen, baci nembeh telu wari dua berngi. 😀

“Adi kerindu, keriken saja, aku lenga bo melihe kel. Enggo ndai ku inem teh manis ras roti ketawa dua bas panggang ah ndai,” ningku erbual sitik.
Sempat turah alasenku bage rupa erkiteken kuidah panggang nda pe labo mbuesa, janah nande jabu teridah latih kel akapna. Pasti melihe kel ia, bage ateku. Jadi gelah ula ia terbiar biar mansa, maka ku kataken aku labo melihe.

Dung kenca anak si kitik naiken jatah bas tenten nandena, minter kuambil alih, kuangkip ku darat ras kupeturut nande jabu sisada man i tengah jabu. Aku pasrah kune panggang sikubaba tandes lanai ertinading. Toh, lit denga nge gulen erpagi-erpagi ndube jadi baginku.

La ndehksa, kenca Nandé Jabu elah man, minter ka ia erpilas.

“Mis ka aku laus e, ya. Nggo kari melaunsa,” nina bagi si terudu.

“Ue yah ….” ningku ngaloi.

“Man kam,” nina janah ndeheri aku. Emanna pipi anak si kuangkip. “Kubegi nge ndai gruduk beltekndu.” nina erkusik janah cirem-cirem.

Beg!
Bagi si mela kel kuakap. Sebab tereteh nari nge aku erbual. Tapi kutawai saja.

“Guruduk labo ban melihe, tapi cacingen kin,” ningku ngaloi penereng matana.

“Keriken saja bengkau ah ndai. Kari mali..” nina janah laus nadingken kami. Laus naiken emonna sada wari enda.

Kenca Nande Jabu lanai idah ilapna, kucibalken anak si kitik ibas inganna jemolah jemole. Ije nari minter ka kupekena piring perpanganenku. Tuhu melihe enggo tergejab bas beltek sejengkal. Labo kepe lepak pengakapen Nandé Jabu. Keroncongan tuka belinku …

Tapi astaga!

Bagé kutatap panggang si tadingken nande jabu, sempat aku tersinik kentisik. Sebab kudapeti cincang bulung gadung tuhu tandes lalit si tading, tapi daging bengkau, lain kenca 3 potong, lalit panna.
Kuah sopna pe lebih setengah i ahankenna. Kenca kupepayo, andiko … buen kepe itadingkenna sekerajangenku!

Amin bagepe, aku yakin Nande Jabuku pasti besur, ngidah perurak nakan ibas panci.

Ah, payo tuhu ari. Ieteh Nandé Jabu kepe aku erbual. Ietehna kepe aku melihe.
Emaka ahankenna baginku si mbuena. Hmm … tergejap malem bas pusuh. Suwer!

Endam kepe nanamna radu siangkan.
Radu siergan….
Radu sikelengen…
Radu si legin ukur…

“Ah! Bujur Tuhan, enggo pejumpaken kam aku ras sekalak diberu, si ngasup nemani aku tupung susah bage pe tupung senang….” ningku sisada, la kugejab.

Bagem pedah man bandu keluarga si mbaru. Gelemlah perarihendu. Siangkan, siergan, sikelengen ras silegin ukurlah kam ras anak jabundu.
Ingetlah perpadanendu duana, bagem nina khotbah i rumah ibadah. Aku ersinget ngenda ngenca. Bujur. 😀 😀

Intermezo.

This entry was posted in Berita, Cerita (Turi - Turin), Informasi Untuk Kab. Karo, Taneh Karo Simalem. Bookmark the permalink.

Leave a Reply

Your email address will not be published. Required fields are marked *