TURI-TURIN PADAN PENGINDO

Kenca seh telu bulan jelma manusia ipetuang-tuang, i petembe-tembe Dibata ibas bertin nandena, maka jelma manusia enggo ertempas bagi jelma manusia. Ije reh nina Dibata man tinepana e, “Kai kal nge pemindomu, maka engko nggit jadi jelma manusia?”

E reh nina tinepa Dibata e man Dibata, “Aku la nggit jadi jelma manusia.” E maka ndekah i aneng-aneng Dibata, gelah nggit tinepana e jadi jelma manusia. Dungna nina Dibata, “Erjanji kita, kai pe pemindonmu kubere gelah ko nggit jadi jelma manusia. Jenari erpadan ka kita, maka bicara kuga gia, mesera ntah entabeh ibas wari terang pagi, ola kal i sumpahi ko aku, tapi sumpahi gelah jadi pengindonmu, di kune pagi la i akapko sikap kerna kegeluhenmu.

Emaka gengudari bahanlah pemindonmu, kai pe i pindo ko kubere gelah nggit jadi jelma manusia ndai. Entah jadi raja atem, entah jadi penggual, entah jadi erende-rende, entah jadi pande namora, enta jadi percakap-cakap, entah jadi kalak merawa maka dat nakan, entah jadi perjuma, entah jadi kadi denga si deban, gelah engko nggit nandangi wari terang ndai.”

Jenari nina ka dibata man tinepana, “Bage pe kerna perjabun entah mesera iakap ko muat empon, entah mesunah, entah empo la erngadi-ngadi, entah la pernah mbalu, entah mbalu la erngadi=ngadi. enta la enggo pernah mate anak, entah mate anak la erngadi-ngadi. Entah mesera muat naka pagi rebi, entah la pe latih kujuma reh rusur nakan man pangan. Entah jadi permakan melala lembu ras kerbo man permakanen, las la tampil las, udan la tampil udan, i embari nge rusur asuh-asuhen gelah ola ku juma kalak.

Kerna umur, banci ndekah ngiani wari terang, cawir metua nggawer-gawer abu, entah mate danak-danak, entah mate nguda anak perana.
Melala atem beras i raukmu man belanjam ibas wari terang ndai, entah sitik saja i jemput ko pe banci kubere nge, mbue ras sitik atem dorek nge”

Bage pe man pemindon si diberu, i sungkuni Dibata ka nge pemindonna maka ia nggit jadi jelma manusia.
sumber : www.karo.or.id