ERLAJANG KU TANEH AMERIKA

Nai, sanga kami tading i kota Palembang, menam tiap bulan lit saja kalak Karo ertalipon nungkun-nungkun informasi. Lit sinungkun kerna lowongen dahin, lit ka sinungkun kerna banci langna numpang i rumahta sopé dat dahin. Lit ka pé nungkun pasaren erga taneh perjuman i sekitar kota Palembang rsd, rsd.

Piga-piga ia sinungkun informasi kedungenna reh menggep i kota Palembang. Lit si dat dahin encagé ringan ras menetap i Palembang. Lit ka si pindah  erjuma. Meriah pé ukur kami asum si é dé lit kenca tambah kalak Karo ringan i Palembang. Ma reh riahna siakap, ningkami sienggo lebén reh ku Palembang. Lit ka déba nerusken perdalanen ku Jakarta erkitéken la dat dahin si sué i Palembang.

Erbagé-bagé sipatna sinungkun-nungkun informasi sanga é. Lit ka déba la ka lupa terumput kata mindo séwa bus. Enggo kenca bagé, bené belas-belas, sebab seh kel ngé buéna cara gelah maka la perlu nggalar sewa motor Medan – Palembang, tapi perlu terbeloh nampilken bana man per truck tah pé per bus.

Gundari, kami sada jabu ringan ras erdahin i Negara Amerika. 16 tahun dekahna kami enggo i jénda, sikuingetna 2 kali denga ngenca lit kalak Karo Indonesia nari nungkun informasi pendahin. Dé nungkun kerna taneh perjuman, sada kel pé la lit siertalipon.  Tah uga maka bagé labo kuangka kel. Padahal seh kel belangna taneh man perjuman i jénda. Ergana pé murahen ka asangken erga taneh i Taneh Karo.

Banci jadi erkiteken merari jelma meteh siugapana pé kerna Amerika. Jadi, lanai iakap lit perluna nungkun-nungkun informasi ku kawes kemuhen. Dampar sidéban, mungkin saja mundur sopé maju nginget keterbatasen bahasa ras bage pé serpi séwa transport Indonesia – Amerika. Tambah toléna, muat visa ijin masuk Negara Amerika pé seh ka kel serana. Uang pendaftaran saja jutaan rupia, visa lenga tentu daten.

Payo, tuhu la mesunah berkat ku Amerika, tapi kalak sideban lit saja nge rusur reh ku jénda tep-tep wari. Dé kita Karo, sada-sadai lit kang. Tapi, umumna anak sekolah tah pé kalak sierserpi. Dé ndaram-ndarami dahin tah pé lako ngelajang bana, ibas 5 tahun perpudi énda menam lalit. Salin katanta ndai, tersungkun tempa rusur ukur nibaba, tah kai ngé sebabna maka bagé.

“Ea’ah kam ngenca nggit tading bas Amerika énda, ban la kam beloh nggelohken bana bas Taneh Indonesia, ngelajang bana kam ku jenda,” nina ka nini Tigan California janahna ngkarih nakan.

“Bagé, lit ka tempa perpayona. Melala tuhu kalak bayak i taneh kemulihen, padah kin i kota-kota besar, i kuta-kuta pé seh kel nge teremna kalak bayak. Tapi tek aku teremen denga ka ngé kalak musil si bagi kita énda,” ningku ngaloi si Nini Tigan.

“Uga dagé? Sitenahken kerina kadé-kadénta ku jénda?”

“É dahkam adi tenahken ningen, tah la ka gia kita pang. Saja, dé reh ia sialo-alo janah sisampati asa ngasupta.”

Uga dagé carana maka banci erlajang ku Taneh Amerika? Melala dalan ku Roma nina per sastra Melayu. Adi nggit ras merhat, lit saja nge rusur dalan. Lit dalan sipinter lit ka simélok-élok. Saja dé arah dalan sipinter, serpi man pekenan asa biasna. Kerina persaraten visa pé ula lupa isikapken.

Eak, dé dalan simélok-élok, uga?

Jé kap maka biasana ertalipon kalak man teman-temanna sienggo leben erlajang ku jénda. Tersungkun-sungkun kerna informasi siugapana pé. Bagi semalna, dé mélok-élok ia, reh dohna tempa dalan siman dalanen; ula permela, ula perbiar, tapi serpi la mbué perlu. Piga-piga kalak sienggo ndalanisa lit ka janah-janah erdahin bas kapal, encagé ibas paksa si mengijinken, mendarat ia i Taneh Amerika, teruskenna sekolahna. Tamat sekolah, daramina dahinna, piah kedungenna dat ijin tinggal menetap.

Setuhuna paksa gundari labo min mesunah ndatken dahin, tapi bas bidang-bidang tertentu lit saja lowongen dahin man kalak asing, perawat, dokter, ahli komputer ras melala denga erbagéna, lain negara bagian lain ka macamna. Sada hal siperlu inget, i Negara Amerika énda umumna ijazah sekolah saja la bias jadi asam ngelamar dahin. Perlu ka ia sertifikat si nipedarat lembaga tertentu i negara bagian masing-masing. Gelah dat sertifikat, lit ka ujian-ujian siman dalanen, terikut pe persaraten-persaratenna. Déba-déba ujianna banci ka iikuti i Indonesia nari. Bagi katanta nda, melala dalan-dalan siman dalanen. Dé itulis kerina contoh-contoh-contohna, sada buku mekapal pé la siat. Kuncina, nggit nungkun-nungkun ndarami informasi.

Dé nungkun kam, uga dalan-dalanna maka Pa Canggah énda ngelajang bana ku Taneh Amerika, é banci sitek kuturiken. Tiap tahun Pemerintah Negara Amerika ngelitken lotere ndatken ijin kerja ras netap, sinigelari lotere green card. Tah kai gia deba gelarna. Asum si é tahun 1994, icubaken kami ikut lotere. Ndarat gelar sirukat nakan, si Nini Tigan. Alu lotere green card si datken sirukat nakan, kami sada jabu banci berkat ku Taneh Negara Obama énda. Asum sié presidenna Pak Clinton. Cara-cara ngikuti lotere green card pé setuhuna melala kang élok-élokna. Sekali nari, perlu tersungkun man teman-teman sienggo arah lebe.

Cakap bual-bual la bualta sendah sengaja itulis sitek kerna ngelajang bana ku Taneh Amerika, sué ras pemindon sekalak kempu Pulau Perca nari. “Kam laki, kerna Taneh Karo silalap cakapkendu, sesekalin ersumekah kam kerna amerika, uga?” nina si kempu arah emailna.

Éak éndam ia sitek turi-turinna kempu, ogénkenndu man teman-temanndu tah lit gunana. Terumput salam bengkilandu Pa Sam alias Uncle Sam.
sumber : http://www.sorasirulo.net

This entry was posted in Cerita (Turi - Turin). Bookmark the permalink.

Leave a Reply

Your email address will not be published. Required fields are marked *