PAK, JAM BERAPA SEKARANG?

Cirem kita kentisik aron…

Bas perdalanen Kabanjahe nari ku Medan i datas Sinabung Jaya, sekalak anak perana nungkun man sekalak perbapan sikundul isebelahna, “Jam piga gundari Pa ?” La iarap anak perana enda perbapan ndai sinik saja, seringkenna pe lang. Ntah la nge begi bapa enda ate anak perana ndai, sungkunna mulihi seh 3 kali, tapi perbapan ndai sip lalap, diatena pe lang. Tuhu ngilas rikut palak ate anak perana enda, kuitna perbapan ndai janah nina, “Uga maka kam sip lalap kusungkun Pa, mamang kel ateku ernehen kam pei… kai nge susahna njababsa…” Tupung berjut denga ayo anak perana ndai, ersumekah me si perbapan enda, “Labo ateku la njababa penungkunenmu ena ndai o Tongat, adi kujabab uga pe pegedangmu ka me kari cakap… ertutur ka me kari atem kita, banmu ka me kari dalan-dalanna gelah kita sikade-kaden…” Reh mamangna ate si anak perana iceramahi perbapan enda, “Kai kin salahna adina kita ertutur Pa, tah sikade-kaden nge kin pe kita ?” Erjabab perbapan nina, “Kari ijemput anakku ras ndeharangku aku i Simpang Kuala, adi nggo sikade-kaden janah radu nusur ka kita, ugapa pe kupetandaken ka me ko kari man ndeharangku ras anakku. Etehko kin… ndeharangku beru Biring, merandal kel kalakna man kerina jelma… anaku pe bage, singuda-nguda, mejile kalakna… ngerana mehamat… man la merimah, erburih la mekupir… Emaka itawarina me ko kari singgah ku rumah kami, terdekahen ngena me atem anakku… piahna jadi kelaku me engko pagin…” Tambah mamangna ate anak perana ndai, reh bingungna ia… “Amin bage gia kai hubungenna ras penungkunenku sipemena ndai Pa”, nina anak perana kemamangen. Cinder perbapan ndai janah jerlengna si anak perana, nina erjabab” “GELAH ETEHKO YA….. LA ATEKU BAGI ENGKO EI KELANGKU, JAM SAJA PE LA LIT, UGA NGE PAGI ATEM NGASUHI ANAKKU ???” ==== Emaka metenget kita adi nungkun jam man kalak si deban, banci kena rawa… ha..ha..ha..ha..
kiriman dari : fb : Bulang Joo Perjuma Namoraya

This entry was posted in Ragam Cerita Operasional. Bookmark the permalink.

Leave a Reply

Your email address will not be published. Required fields are marked *