GURDA GURDIKU

Puisi: GURDA GURDIKU

Oleh: Juara R. Ginting

Teldak telduk kusuan duruna

Malem pinakit kaka tua guruna

Naktak ménda si sahun surung

Embang keléwet dalen metunggung

Sekin melias penggelat mungkur

Bilang-bilang nibelas dalenta rukur

Meranti batu si tanduk modang

Bombang-bombang ndakep galumbang

Njolé-joléken lawitna simbelang

Tading minik-minik erkinigagang

Pusuh teriluh palirna ku bituka

Pulu Balang ngokoi tetadingen

Ibilang ménda pedah la erleja

Maka ula lit si naling-nalingen

Biol mumuk ernaliken kegeluhen

Réncéng tulpak penalih ranggut-rangguten

Tumundul kem ma kamu si hasut-hasuten

Perkoeah usur-usur nang ngaluri dalen

Pendungi ménda makana bena-bena

Minak tuwalah ijo penaber ngangalah

Ibukui ménda dahin la erleka-leka

Turbang ma kamu gurda-gurdiku Perkoeah
sumber : sorasirulo

This entry was posted in Puisi. Bookmark the permalink.

Leave a Reply

Your email address will not be published. Required fields are marked *