BUAL-BUAL LA BUAL: SALAM MERDEKA, SALAM JAYO………

Pa Canggah Ginting (California, USA), Mbera lenga kita lupa makana tanggal sepulu-pitu bulan waloh énda éme wari kemerdekaan negaranta. Enggo enem pulu pitu kali kita mentasi wari kemerdekaan ningen é. Enem pulu-pitu ka enggo buéna panitia perayaan wari merdeka si kus-kas ngerancang ras ngatorken acarana tiap tahun i tiap-tiap daerah. 0

Melala erbagéna acara sibanci sidédah, lit siergendang, erkibod, ersandiwara, erlomba kiam, nangkih batang pinang ras sidébanna ras sidébanna. Pas bas matana iogéken me text proklamasi: “Kami bangsa Indonesia dengan ini menjatakan Kemerdekaan Indonesia. Hal-hal jang mengenai pemindahan kekoeasaan dan lain-lain diselenggarakan dengan tjara seksama dan dalam tempo jang sesingkat-singkatnja.”
Tangkas teridah kai ertina text proklamasi énda ndai. Merdeka ningen é labo tuhu adi lalit pemindahen kekuasaan. Pemindahen kuasa ras sidébanna é pe labo ka lit ertina adi melet-let, émaka perlu ilakoken alu meter.

“Saja ngenca kila….payo kin nge kita enggo merdeka nina text proklamasi éna ndai?” Nina sekalak sibiak permén kempak bengkilana ibas jambur simandé angin. “Maka bagé nindu permen?” Ngaloi si bengkila.

“Adi ningku kila, lenga bo kita merdeka kel. Silhangna lenga merari permerdekanta. Sebab, seh asa gundari lenga bo kuidah lit pemindahen kuasa man kita kalak Indonesia. Lo pedah ndoh-ndohsa, kita kalak karo lah lebé yah, lit kin idahndu enggo pemindahen kuasa man banta? Pesikap Tahura saja pé la lit kuasanta. Encagé sada nari kila, merdeka labo saja merdeka ibas pengertin lanai ikuasai bangsa si déban. Lebih asa sié, merdeka ertina ‘jayo’ ras nggeluh bagi oratna,” nina si permen ngumputi rananna dingenna cinder muat berkat ku rumah.

Cakap-cakap si permen ras bengkilana enda ndai setuhuna megati terbegi bas percakapen-percakapen jelma sienterem. Adi persoalken banci saja peterangken bual, bual sipaya-paya, bombang-bombang lalap la maler.

Maka bage ningku, ibas pengertin lanai ijajah bangsa sideban, payo kita enggo merdeka kinahun tahun 45 nai, tapi enggo dage kita tuhu-tuhu “jayo”, enggeluh bagi oratna? Jayo ras enggeluh bagi oratna ningen e pe banci denga ka iorat-oratken dingen ijerret-jerret terdauhen.

Jelas makana kegeluhen bangsanta lenga bo merari bagi oratna, alu kata sideban lenga bo tuhu-tuhu merdeka. Man rayat sirulo kegeluhen asal nggeluh saja pe enggo sada erbage. Apaika adi ngeranaken serpi pertambar ku rumah sakit, serpi nekolahken anak, bage pe serpi man keperlun-keperlun sideban.

Kai kin nge ndia sebabna maka merdeka la i jajah kalak ngenca silalap, merdeka “jayo” eggeluh bagi orat lalap la mbera?

Jababna,  banci saja sisalahken sinatang layar-layar si la ermediate, tahpe rayat sirulo si kurang terbeluh-bana ndarami pencarin simehuli. Tapi bagi kata permen bengkilana bas jambur ndai, setuhuna  “pemindahen kekuasaan” bas sierkuasa nari kempak rayat Indonesia lenga bagi oratna.

Pesikap dalan kecamatan arus ka Pak Camat mindo-mindo ku kantot Bupati. Adi pesikap dalan kabupaten, perlu ka Bupati mindo-mindo ku kantor Gubernur. Jemaka perlu ka pak gubernur mindo-mindo ku pusat. Nina ernina-nina, kerinana sie perlu ka lit pulungen tawarna siman pekenaen, tah tuhu tah lang, mbera ula tuhu.

Ngidah-ngidah sibage rupa, labo ate mamang adi paksa gundari enda enterem rayat sirulo i kecamaten-kecamaten ngarap maka statusna itingkatken jadi kabupaten Sebab alu bage lit pemindahen kekuasaan bagi sinipersingeti text proklamasi ndube. Jenari iarapken ka kegeluhen jayo bagi orat banci terjaka.

Salam merdeka, salam jayo man banta rayat sirulo kerina.
sumber : http://www.sorasirulo.net