TANGIS TURANGNDU, BAPA

Isuratken: Usi Pieta br Ginting

Erjabu agi ngempoi beru Tarigan. Tuhu meriah ukur erjabu agi amin lit denga kaka lenga erjabu. Tapi, la kepé bagé ibas bapa. Seh warina Ngembah Belo Selambar, ikataken kerina si biak man katanken, tapi bibi (turang bapa) la ikataken. Kerina jiné anak beru nalu-nalu bapa gelah ikataken bibi.

La erkusur pusuh bapa aminna kerina tangis teriluh ngkusursa. Mekeras tuhu ukurna. “Kai ngé ndia sangkut bas pusuhndu, bapa, maka la ikatakenndu ia?” Nina biak anak beru bagé pé agi si empo. La nai kin aténdu erturang maka la ia kataken?” Nina ka abang sintua.

“Aku pé erturang kel nge atéku nakku, tapi adi turang ningen, lit uis merigat jarumina. Labo ipebelangna uis simerigat é. Aku pé céda kel nge ukurku, nakku, la ia kukataken,” nina bapa. Sengget kami megi katana. “La terturiken aku kerina, nakku, kerna si é,” nina rikutken iluhna mambur erbahanca kami pé ikut teriluh.

Seh ménda mata kerja. Lampas kaka si lenga erjabu mulih ku kuta. Seh i kuta isungkun ménda nandé ras éda i tengah jabu. “Nandé, enggo katakenndu kerina bibi ras bengkila ku kerja agi é?” nina kaka si tading i Medan.

“Lang nakku. La aku pang nimbak bapandu. Kerina kel kami nggo nalu-nalu bapandu é gelah erkusur ukurna ngataken bibindu ras bengkilandu,” nina nandé. Idahi ménda bibi ras bengkila.

Mis ia ngandung. “Kai kel nge ndubé salah kami man bapandu, nakku? La kel kami ikatakenna kerja agindu ndai,” nina janahna ngandung. “Bagi sibombang kuakap, nakku, perban kami ngenca la ikataken bapandu. La kami pang ku jambur erdakan adi la kin bapandu ngatakenca man kami. Tah lanai kin tuhu erturang até bapandu. Adi aku, la aku ngasup la erturang, nakku, amina gia bapandu é lanai aténa erturang. Kusapu tentenku gelah malem pusuhku. Lang seh kel sedakna, nakku, permén kami kel sierkerja é la kami atan i jé,” nina bibi. Tuhu céda ukur bibi.

“Ula aténdu nembeh kerna si é, bibi. Kami lah tatapndu perménndu. Mekuah aténdu aminna gia la kam ikataken bapa. Kami ménda erkata bandu,” nina kaka si Medan nari janahna teriluh.

Seh maka ibas kerja reh bibi ras bengkila. Aminna gia bas pedalan adat bapa ras bibi la erkuan, seh asa gundari.
sumber : http://www.sorasirulo.net