TEROMBO KESAIN RUMAH PUDUNG SEMBIRING GURUKINAYAN KUTA GURUKINAYAN

K A T A    P E R L E B E
( p e m e n a )

Mejuah-juah,

Ibas sekitar tahun pitu puluhen pernah isungkun kaka tua Kueteh Sembiring Gurukinayan ( Pa Bas Ukurta, blok Terombo 37 ) ,  uga hubungen  keluarga  ras Sangkut Ginting ( Blok Terombo 45). Adina orat  tutur  kueteh maka  kami  rimpal, tapi kuga maka rimpal e  lanai  kuinget  sebab ndauh sebelumna enggo nge pernah ituriken keluarga man bangku, tapi sanga sie lakuakap penting kal emakana lanai ku inget adina sungkun ka genduari uga makana rimpal.

Enca  kejadian  sie reh sada penungkunen ibas diriku,  adina  aku  sendiri  pe  lanai  kueteh kuga hubungen  keluarga  ras  kade-kade  sidebanna   silit  denga  hubungen  dareh  apaika  pagi   generasi  selanjutna, tentu generasi selanjutnna  pagi lanai bo sitandan bagepe lanai tehna orat  tuturna  kerina. Padahal genduari  keturunen  ibas  keluarga Kesain Rumah  Pudung  enggo melala ras marpar siinganna tading  pe  enggo ndauh  i  kuta Gurukinayan nari. Enda tentu sangat  merugiken  man  banta kerina adina kita pagi lanai sietehen orat tuturta  situhuna entah pe lanai sitandan pekepar ija gia pagi kita jumpa.

Kebetulen  ibas bulan September 1979 aku mulih ku Gurukinayan  ras piga-piga  minggu  berikutna  kaka Nd.  Bas  Ukurta  br  Sembiring  Meliala ( Selat br Sembiring Meliala, Blok Terombo 37) pe mulih ku kuta. Ibas sanga kami pulung i jabu Bapa Nguda Rekat   Sembiring  Gurukinayan  (Pa  Nimpan, Blok Terombo 39)  kuorati   kerina keluargata  siikut  pulung ibas berngi e emkap :  Rekat  Sembiring  Gurukinayan (Pa Nimpan) , Goto br Sitepu (Nd. Nimpan) , Releng br Sitepu  (Nd. Kueteh), Tangsi  Sembiring  Gurukinayan   (Pa Mbina, Blok Terombo 46), Pawen br Sitepu (Nd. Mbina), Selat br Sembiring Meliala (Nd. Bas Ukurta), Simpan br Sembiring Gurukinayan (Nd. Tenang), Anna br  Sembiring  Gurukinayan  (Nd. Masta)  ras   Asia Ginting  (Pa  Sukamulia). Tepatna tanggal kami pulung  ibas  berngi  sie  emkap 6 Oktober 1979, wari Kamis.  Sanga sie secara  garis  besar  enggo lit data keluargata kerina walaupe lenga  lengkap tapi untuk  sementara  kuakap cukup isusun sada konsep trombo  keluarga  Rumah  Pudung.
Rencana enda tertunda terus seh ibas akhir tahun 1984 maka konsep  enda  tersusun ras kubaba ka mulihi ku  kuta  untuk  lebih  isempurnaken  bagepe  enggo banci sisusun terdauhen  kudatas  enca  jumpa  ras  kaka tua Arsim Sembiring Gurukinayan (Pa  Ranita, Blok Terombo 24), bibi Nd. Bagem br Ginting  ( Blok Terombo 43) ras bibi Nd. Ingansip br Ginting ( Blok Terombo 44) simeteh  melala mengenai keluargata Kesain Rumah Pudung, Rumah Tengah I kuta Gurukinayan.
Genduari  Terombo  Keluarga  Rumah Pudung  enggo  tersusun  amin gia melala denga  gelar anggota keluargata silenga  terpepulung, enda erkiteken   waktu  siterbatas  janah  pe  lanai  terorati   kerina keluargata  sideban  simungkin meteh data sikurang  enda.  Bagegia untuk  tahap  pemena  enda,  enggo  tersusun  seh  ku  generasi si pepituken  sinimulai ibas generasi pemena sigelarken Nini  Bulang  Pa  Sida Sembiring Gurukinayan.
Untuk  menyempurnaken  trombo enda ngarap kal kami man  kam  gelah  ras-ras  kita kerina ngorati keluargata sideban. Adina  enggo  lit  data  sikurang  enda ibas kam, apaipe kam la erdobah   gelah   mis kirimkendu  ku  Jakarta sesuai ras nomor (kode)  sienggo  isusun  ijenda,   atau   mungkin   lenga  lit   nomorna   erkiteken   data  siterpepulung   mbarenda  keliru  maka  banci  ibandu   catatenna.
Selanjutna  pagi  adina enggo lengkap data keluargata  kerina  seh  kugenerasi   pepituken ,   banci  sisusun   sada   buku   trombo  sinirencanaken ikirimken man kerina keluargata simbutuhkenca.
Perlu  itambahken kami, maka situhuna lit denga aggota  keluargata sideban silenga banci termasukken ibas trombo enda erkiteken lenga lit   data  siterdatasen  ibas  Nini  Bulang  Pa  Sida   Sembiring Gurukinayan. Mbera-mbera pagi adina enggo lit trombo enda banci ka sieteh  terdauhen  kudatas  gelah kerina  anggota  keluarga  Rumah Pudung Gurukinayan nari lanai lit sitading-tading.

Sibar  em lebe ras erpengarapen kami gelah terombo keluargata  enda banci erguna man banta kerina ras lebih sitandan kita ijapape kita pagi jumpa.

Bujur ras mejuah-juah kita kerina.

Jakarta, 8 April 1985.-

Rophian Sembiring Gurukinayan.

This entry was posted in Silsilah / Terombo Rumah Pudung Gurukinayan - Kesain Rumah Tengah - Kuta Gurukinayan. Bookmark the permalink.

Leave a Reply

Your email address will not be published. Required fields are marked *